సరదాగా సర్వలఘు కందం

కం:-
ఛురికనొదలి తురగగతిని
పరుగిడవలెననుచు మనము, పలువిధములుగన్
హరిచరణములకు ప్రణతులు,
కరివదనునకును వినతులు ఘనమని తెలిపెన్.

చ"తురంగ" బంధం వ్రాయాలని మనసు ఉవ్విళ్ళూరుతోంది. ఎవరి గురించి వ్రాసి నన్ను బంధముక్తుణ్ణి చేసుకోవాలో నిర్ణయించుకోలేక పోతుంటే, పైన యిద్దరి గురించి యెన్ని విధాలుగా వ్రాసినా బాగుంటుదని నా మనసు తెలుపుతోంది అన్నది నా ఉద్దేశం.

ఛురికాబంధంలో గణపతి ప్రార్ధన

కం:-
జ్ఞానవన! ఘనగుణావన!
దానవ నశ్వరకృతామృతా! కరివదనా!
నానాత్వవినాశక! వర
దా! నవసౌగంధిభూషితా! ధీ సదనా!

సింహాసన బంధం

కం:-
అంబా! బాహ్యాంతరచర!
మాం, బంభరబృందవేణి! పాహి త్రివేణీ!
అంబర మహిమా చుంబిత
అంబుజ సింహాసన జనితానందాబ్ధీ!

బొమ్మలో పసుపు రంగులో ఉన్న అక్షరాలన్నింటికీ రెండువైపులా సమాన సంఖ్యలో మిగతా అక్షరాలుంటాయి. పసుపు రంగులో ఉన్నవాటిని, చదివితే "అంబా మాంపాహి సదా". హా! చివరికి అమ్మవారికి సింహాసనం రూపించాను! వ్రాస్తున్నప్పుడు కష్టంఅనిపించినా, ఇప్పుడూ చాలా హాయిగా ఉంది.

ఛురికాబంధం

కం:-
బంధ బుధవిధ విశారద!
సుందర దరహాసితాస్య! సుగుణాంబునిధీ!
ధీ,దమ,శమ గుణశరధీ!
సుందర కవనారవింద ఛురికాకంధీ!

ఛురిక అంటే కత్తి. మరి ఆ కత్తి ఎక్కడుందో చూద్దామా?
(ఈ ప్రక్రియ చెప్పిన చింతా రామకృష్ణారావుగారికి కృతజ్ఞతలు తెలుపుతూ వ్రాసిన పద్యం. పోటీగా మాత్రం కాదు.)